Alcan á Íslandi

24.11.2006

Starfsmenntaverðlaunin 2006 í okkar hlut!

Starfsmenntaverðlaunin 2006 voru afhent á föstudag og í flokki fyrirtækja hlaut Alcan verðlaunin. Hr. Ólafur Ragnar Grímsson, forseti Íslands, afhenti verðlaunin við skemmtilega athöfn að viðstöddu fjölmenni í Húsi atvinnulífsins en þetta er í annað sinn á sex árum sem Starfsmenntaverðlaunin koma í okkar hlut.

Við erum stolt af þeim mikla heiðri sem starfsmönnum og fyrirtækinu er sýndur með verðlaununum en að baki þeim stendur Mennt, samstarfsvettvangur aðila vinnumarkaðarins, skóla á framhalds- og háskólastigi og sveitarfélaga.

Starfsmenntaverðlaunin hlýtur Alcan fyrir starfsemi Stóriðjuskólans, en hann hefur frá árinu 1998 gegnt lykilhlutverki í rekstrinum og ítrekað sannað gildi sitt.  Nærtækasta dæmið er sá árangur sem náðist á liðnu sumri eftir að alvarleg rafmagnsbilun olli rekstrarstöðvun í kerskála 3. Með ótrúlegum hætti tókst að koma kerskálanum aftur í gang tveimur mánuðum fyrr en upphaflegar áætlanir gerðu ráð fyrir og það er okkar skoðun að tilvist Stóriðjuskólans hafi þar skipt sköpum. Með honum hefur byggst upp mikil fagleg þekking á rekstrinum auk þess sem skólinn hefur tryggt ákveðna samræmingu meðal starfsmanna.

Við metum Starfsmenntaverðlaunin mikils og þau verða okkur hvatning til að gera enn betur á komandi árum. Við þökkum öllum sem komið hafa að rekstri Stóriðjuskólans fyrir samstarfið og óskum þeim til hamingju með árangurinn.