Alcan á Íslandi

25.02.2011

Rio Tinto Alcan tilnefnt til Þekkingarverðlauna

Rio Tinto Alcan á Íslandi hlaut í gær viðurkenningu sem eitt þriggja fyrirtækja sem tilnefnd voru til árlegra Þekkingarverðlauna Félags viðskipta- og hagfræðinga. Þema verðlaunanna í ár var "verðmætasköpun".

Alls voru 122 fyrirtæki nefnd í könnun meðal félagsmanna en dómnefnd tilnefndi þrjú: Rio Tinto Alcan, Icelandair og Samherja.

Meðal þess sem dómnefndin studdist við í vali sínu var skýr framtíðarsýn, stefna og gildi sem endurspeglast í árangri fyrirtækisins síðastliðin þrjú ár, skilgreindar aðgerðir sem styðja við þennan árangur, samfélagsleg ábyrgð, hvaða ferli séu til staðar til að tryggja að verðmætasköpun fyrirtækisins sé stöðugt í vexti og síðast en ekki síst góðir stjórnarhættir.

Icelandair hlaut Þekkingarverðlaunin en Rio Tinto Alcan og Samherji hlutu einnig viðurkenningu sem veitt var af forseta Íslands, hr. Ólafi Ragnari Grímssyni.

Sigurður Þór Ásgeirsson, fjármálastjóri og staðgengill forstjóra Rio Tinto Alcan á Íslandi, tók við viðurkenningunni fyrir hönd fyrirtækisins.

Forseti Íslands hrósaði í ræðu sinni fyrirtækjunum þremur fyrir mikilvægt framlag þeirra til endurreisnar íslensks efnahags- og atvinnulífs. Hann áréttaði nauðsyn þess að haldið yrði á lofti þeim góða árangri sem væri að nást víða í atvinnulífinu, eins og þessi þrjú fyrirtæki sýndu. Varasamt væri að vera aðeins með eina sögu í umræðunni, sögu erfiðleika og afturfarar, þegar ljóst væri að á fjölmörgum sviðum væri að nást til muna betri árangur en áður.

Sigurður Þór Ásgeirsson fjármálastjóri og staðgengill forstjóra Rio Tinto Alcan á Íslandi (lengst t.h.) ásamt fulltrúum Icelandair og Samherja og forseta Íslands við verðlaunaafhendinguna í gær.