03.01.2011

Hávaði frá löndunarkrana

Óvenjulega mikill hávaði barst frá súrálslöndunarkrana álversins þegar verið var að landa súráli á milli jóla og nýárs. Bárust um þetta tvær ábendingar frá nágrönnum álversins, önnur frá Álftanesi og hin frá Hvaleyrarholti.

Starfsmenn samskiptasviðs álversins fóru á vettvang á Hvaleyrarholt og sannreyndu að þar var á einstaka stöðum þungur niður eða drunur sem augljóst var að gátu verið afar truflandi. Endurkast og/eða ómun (resonance) við byggingar eða annað í umhverfinu virtist magna niðinn á afmörkuðum stöðum, þótt hann heyrðist varla fáeinum skrefum frá.

Skýringin á hinum óvenjulega mikla hávaða er sú að hljóðdeyfir löndunarkranans þarfnast viðhalds og er viðgerð að hefjast. Ekki er útséð með hve langan tíma hún tekur en allt kapp verður lagt á að ljúka henni áður en næsta löndun hefst, sem verður upp úr miðjum þessum mánuði.

Til lengri tíma litið liggur fyrir að endurnýja þarf löndunarkranann. Til greina kemur að endurbyggja hann eða kaupa nýjan og verður ákvörðun um það tekin á allra næstu vikum. Hins vegar má búast við að það verkefni taki um það bil tvö ár. Þangað til er gert ráð fyrir að unnt verði að halda hávaða í lágmarki með viðhaldi á núverandi hljóðdeyfi.

Súráli er landað einu sinni í mánuði og tekur það að jafnaði sex daga í hvert sinn. Ákveðið hefur verið að mæla hávaða frá löndunarkrananum í hverri löndun svo að unnt verði að greina frávik fljótt.

Álverið í Straumsvík leggur áherslu á að starfa í sátt við umhverfi og samfélag. Allar ábendingar um hvað megi betur fara eru vel þegnar. Þeim má koma á framfæri símleiðis í aðalnúmer fyrirtækisins, sem er 560 7000, eða með því að senda tölvupóst á netföngin isal@riotinto.com eða samskiptasvid@riotinto.com.


« til baka