Alcan á Íslandi

29.05.2005

Milljón vinnustundir án fjarveruslyss

Rúmlega ein milljón vinnustunda hefur nú verið unnin hjá Alcan í Straumsvík án þess að fjarveruslys hafi orðið í fyrirtækinu. Þessi merki áfangi starfsmanna er tímamótaviðburður enda hefur aldrei áður liðið svo langur tími án þess að fjarveruslys hafið orðið.

Margt þarf að fara saman svo árangur eins og þessi geti náðst. Á undanförnum árum hefur sterk öryggisvitun fest sig í sessi og meðal starfsmanna hefur mikil breyting orðið á viðhorfum til öryggismála. Rík áhersla er lögð á að öryggismál séu hluti af öllum daglegum störfum, allri ákvarðanatöku, hönnun á búnaði og í raun allri starfseminni. Þjálfun starfsmanna, áhættugreiningar og mælingar á árangursvísum eru stöðugt í endurskoðun og náið samstarf við systurfyrirtæki erlendis veita mikilvægan stuðning.

Hjá Alcan í Straumsvík eru þrír sérfræðingar í fullu starfi við að sinna öryggismálum auk 30 starfsmanna sem hafa skilgreinda ábyrgð hvað varðar öryggismál. Öryggisfundir eru haldnir reglulega á öllum vinnustöðum og í öllum hópum á svæðinu og stöðugt er unnið að úrbótum á verkferlum og vinnuaðstæðum.

Við óskum starfsfólki okkar til hamingju með árangurinn.